გიორგი ქვილითაის გუნდის ფრე ევროპა ლიგაზე

უეფას ევროპა ლიგის ჯგუფური ეტაპის მატჩში ვენის რაპიდმა სასუოლოსთან 1:1 ითამაშა.

მასპინძელთა განაცხადში იყო საქართველოს ნაკრების ფორვარდი გიორგი ქვილითაია.

თუმცა, რაპიდის მე-13 ნომერმა 90 წუთი სათადარიგო სკამზე გაატარა.

მე-7 წუთზე მასპინძლები შაუბმა დააწინაურა. იტალიელებმა წონასწორობა 66-ე წუთზე აღადგინეს, გოლი საკუთარ კარში შრამელმა გაიტანა.

რაპიდი და სასუოლო 4-4 ქულით მე-2 და მე-3 ადგილებს ინაწილებენ.

ჯგუფის ლიდერი გენკია, რომელმაც საკუთარ მოედანზე ბილბაოს ატლეტიკი 2:0 დაამარცხა. მე-40 წუთზე ესპანელებს პირველი გოლი ბრაბეჩმა გაუტანა, მატჩის საბოლოო შედეგი ნდიდმა 83-ე წუთზე დააფიქსირა.

ატლეტიკს 3 ქულა აქვს და უკანასკნელ ადგილზეა.

გაბალას სამიდან სამი წაგება

სტუმრად, საფრანგეთში დამარცხდა ნიკა კვეკვესკირის გაბალა. ქართველი ნახევარმცველის გუნდმა მინიმალური ანგარიშით სენტ-ეტიენთან წააგო. მატჩის ერთადერთი გოლი 70-ე წუთზე გავიდა. გოლი საკუთარ კარში რიკარდინიომ გაიტანა.

საქართველოს ნაკრების ნახევარმცველი, ნიკა კვეკვესკირი, სტუმართა განაცხადში არ ყოფილა. გაბალას ნახევარმცველს ტრავმა აქვს.

ჯგუფის მეორე მატჩში, მაინცისა და ანდერლეხტის დაპირისპირება 1:1 დასრულდა. მე-10 წუთზე გერმანელები მალიმ თერთმეტმეტრიანი დარტყმით დააწინაურა. მატჩის საბოლოო შედეგი თეოდორციკმა 65-ე წუთზე დააფიქსირა.

5-5 ქულა აქვთ ანდერლეხტს, სენტ-ეტიენსა და მაინცს, გაბალა კი ბოლო ადგილზეა. აზერბაიჯანელებმა სამივე მატჩი წააგეს.